|| बिहारघट्टं नहि सन्त्यजामि || संस्कृत कविता हिमांशु गौड़

 || बिहारघट्टं नहि सन्त्यजामि ||

********

यत्र स्मृतिर्वेदविदां गुरूणां

श्रीविष्ण्वाश्रमाणां च तपांसि यत्र

सहस्रविद्वद्बटुकैर्वृतं यद्

बिहारघट्टं नहि सन्त्यजामि||१||

यजुष्प्रियाभ्यासरतोदराग्निर्

जाज्वल्यते पाठगतश्रमाच्च

ततस्स खादेच्छतशष्कुलीर्वै

यत्र, त्यजामो न बिहारघट्टम्||२||

यत्रैकतो नारवरी विभाति

श्रीकार्णवासी नगरी प्रतीच्यां

शब्दप्रियाणां श्रुतिसंहितानां

बिहारघट्टं नहि सन्त्यजामि||३||

श्रीश्यामबाबागुरुदर्शनानि

श्रीमत्प्रबोधाश्रमदेशनानि

गाङ्गानि वारीण्यपि संल्लभेरन्

यत्र त्यजामो न बिहारघट्टम्||४||

यत: प्रयामो ह्यपि रामघट्टं

यतो नमामोऽप्यथ वृद्धिकेशीं

भूतेश्वरं चैव यतो व्रजामो

बिहारघट्टं नहि सन्त्यजाम:||५||

यत्रास्ति मेऽवस्थिविनीतवर्यो

गुरुर्वशिष्ठोस्ति दिवाकरश्च

भातीह भङ्गस्य वनस्पतिश्री:

शिवार्पणाय स्वमुखार्पणाय||६||

घण्टास्वनो यत्र च भोजनाय

स्वरोऽत्र गुञ्जेद्द्विज! हर्षणाय

पठेम गङ्गालहरीं प्रभाते 

श्रयेम तस्माच्च बिहारघट्टम्||७||

******

हिमांशुर्गौड:

०८:२५ रात्रौ

२८/०२/२०२३