शास्त्रस्य धर्मस्य तनोति कीर्तिं
शिवस्य रामस्य जपेच्च नाम
संसारकार्येऽपि हरीशचिन्ता
तादृश्यहो वेदवतीति सान्द्रा||
विदिक्षु दिक्षु प्रसरेत्सुधर्मो
नाशं व्रजेत् पापजतापघर्मो
शिवो भवेत्सर्वजनस्य वर्म
विचिन्तयन्ती सुभगा हि सान्द्रा||
जाता च या नीदरलेण्डदेशे
सा सूरीनाम्ना विदिते प्रदेशे
गुणप्रकर्षैश् शुभदा जनेभ्यस्
सान्द्रा सती वेदवती विभाति||
महच्च पुण्यं प्रभवेन्नृणां यद्
देवेषु पुण्येषु मतिर्भवेच्चेत्
तद्भारते भूमितले समग्रे
प्रख्यापयेद् वेदवतीति सान्द्रा||
पुण्यप्रभावान्मुनिमोदितत्वात्
साधुश्रिया च प्रियशोभितत्वात्
दक्षेश्वराख्ये शिवधाम्नि चाद्य
आध्यक्ष्यमोदं मुदिता वहन्ती||
दक्षेश्वरस्यापि वदामि गाथां
संस्थापितं मन्दिरमत्र यस्य
श्रीकेतुमालेश्वरमन्दिरं च
सुरेन्द्रवर्येण शिवप्रियेण||
म्लेच्छत्वमायन्ति जना पृथिव्यां
भक्ष्यं ह्यभक्ष्यं न विचारयन्ति
तद्वद्धरायां प्रभुपूजनानि
प्रसारितानीह सुरेन्द्रवर्यै:||
"अहं पृथिव्यां सुरभक्तिकीर्तिं
प्रसारयन् जीवनयापनानि
करिष्य" - इत्यादिविचारपूर्णं
सुरेन्द्रमीडे शिव! शङ्कराख्यम्||
म्लेच्छत्वजीवेऽपि अपुण्यगन्धे
जातेऽधुना वै विपरीतबन्धे
"जीवेम रामाख्यसुपुष्पगन्धे"
सङ्कल्पितं येन नुमस् सुरेन्द्रम्||
दृष्ट्वा सुरश्रीविरतानपुण्यान्
यज्ञादिहीनान् शिवसूत्रहीनान्
"कथं तरन्त्वत्र जना: द्रुतं च"
विचार्य देवालयनिर्मितिस्स्यात्||
इति प्रियार्थं कृतनिश्चयार्थं
देवद्विजप्रीतिकरं मुदार्थं
अस्थापि दक्षेश्वरमन्दिरश्री
श्रीकेतुमालेश्वरसद्गृहञ्च||
यस्यैकतश्शुद्धजला वहन्ती
सरोवरश्चैव तथाऽपरस्मात्
हंसाश्च कूर्मा: कमलानि तस्मिंस्-
तरन्ति सन्तीह खिलन्ति तत्र||
तत् तादृशं श्रीशिवराट्स्थलं सद्
दक्षेश्वराख्यं विलसद् विभाति
भक्तार्चनासुस्वरगीतरीतिस्
सम्मोहयेत्तत्र सतां मनांसि||
अनन्तबोधोऽपि वसेच्छुभाढ्ये
लोके स्वदेशं च विहाय तत्र
धर्मप्रसारे सुरभक्तिसारे
संसारसारे सुजना निमग्ना:||
तेनैव भूय: प्रतिबोधितस्सन्
हिमांशुगौड: कृतवान् सुकाव्यं
संवर्णयन्तस्सुरदेवगाथा:
विदस्स्वकालं परियापयन्ति||
••••••••
हिमांशुर्गौड:
०९:४७ रात्रौ
०६/०९/२०२२
Comments
Post a Comment